ԱՐԱՄԱՅԻՍ ՍԱՀԱԿՅԱՆ

Քննությունից առաջ

Շուտով և իմ հերթն է գալու՝

Հույզե՜ր, ժպի՜տ, հառա՜չ...

Տրոփում է սիրտը մարդու՝

Քննությունից առաջ:

Մեկ թվում է, թե կհաղթե՜մ,

Ու չի լինի նահանջ,

Մեկ թվում է՝ բան չգիտեմ

Քննությունից առաջ:

Կրկին ինձ է նայում թաքուն

Այն աղջիկը հրաչ,

Որպես ուրի՜շ մի քննություն

Քննությունից առաջ:

Քննություն է կյանքն էլ վաղվա,

Բարեկամներ իմ քաջ:

Ինչպե՞ս եք ձեզ զգում հիմա՝

Քննությունից առաջ:

#Պոեզիա #Ոչմիօրառանցբանաստեղծության #ԱրամայիսՍահակյան